Divan in kollig met twee drieë

Rugby
  • 1 Day Ago 03 April 2025
Die Namibiese heelagter Divan Rossouw is as speler van die week in die VSA se Major League Rugby aangewys, nadat hy twee deurslaggewende drieë vir die Seattle Seawolves in hul oorwinning met 25-17 win teen Anthem Rugby Club van North Carolina gedruk het.

Die Seawolves kry maar opdraand in die kompetisie se westelike konferensie en laas naweek se oorwinning was maar hul tweede in ses wedstryde, wat hulle steeds vyfde uit die vyf spanne laat.

Die 29-jarige Rossouw, wat Namibië by die 2023 Wêreldbekertoernooi in Frankryk verteenwoordig het, is ook as heelagter in Major League Rugby se droomspan van die week vir rondte sewe gekies.

Met sy twee drieë ingesluit het hy teen die Anthem-span 173 meter met die bal gehardloop en met skoppe 64 meter veld gewen.

In die oostelike konferensie is die verdedigende titelhouer, die New England Free Jacks, se twee Namibiese spelers ook voluit terug in aksie ná hul herstel van beserings, naamlik die agtsteman Wian Conradie en binnesenter Le Roux Malan.

Die Free Jacks is tans in die oostelike konferensie derde geplaas (drie uit ses gewen), met die Namibiese skrumskakel Damian Stevens se New Orleans Gold vyfde en die Namibiese losskakel Cliven Loubser se Anthem RC laaste van die ses spanne.

Kyk hoogtepunte van Seattle Seawolves se oorwinning, insluitend Rossouw se twee drieë hier: https://q.my.na/X2VC/