Gevoelige en duur nederlaag teen Bakrania se Tanzanië

Krieket
Namibië se hoop om te kwalifiseer vir die WB-toernooi waarvan hy mede-gasheer is, is in gevaar.
Andrew Poolman
  • 1 Day Ago 03 April 2025
’n Teleurstellende nederlaag teen ’n vasberade Tanzanië in hul 2026 ICC onder 19 Wêreldbeker-kwalifiserende toernooi vir Afrika-spanne laat die Namibiese junior krieketspan se hoop aan ‘n dun draadjie hang.

Namibië en Zimbabwe sal mede-gashere van die 2026 ICC o.19 Wêreldbeker wees, maar weens sy lae posisie op die ranglys verkry Namibië se span nie outomatiese kwalifikasie nie.

In 'n dramatiese wedstryd wat behoorlik wipplank gery het, het Namibië se Walvis Bay Salt Eagles (142 almal uit) Dinsdag in Lagos, Nigerië, met 17 lopies teen Tanzanië (159 almal uit) verloor.

Stadige kolfwerk in die middelboulbeurte het die telborddruk teen die einde van die Namibiese kolfbeurt laat ophoop.

Met die uitslag het Tanzanië onoorwonne gebly en opnuut 'n gevoelig slag vir Namibië in o.19 Wêreldbeker kwalifiserende toernooie gevier.

Twee van Tanzanië se helde was Mohamedi Simba Mbaki (61 lopies van 73 balle) en kaptein Laksh Bakrania (34 van 80 balle, en 2/17 in 10 beurte).

In Oktober 2021 in Rwanda was Bakrania net drie dae verby sy 14de verjaardag, toe sy linkerarm-draaiballe hom 5/28 in 9.3 boulbeurte besorg het op ‘n dag toe Namibië nege paaltjies vir 65 verloor het om vir 152 uitgeboul te word en met 48 lopies te kort te skiet teen Tanzanië se totaal van 200.

Vier jaar gelede was die Namibiërs uiteindelik een van drie spanne wat met ewe veel punte geëindig het en is uitgeskakel in die wedloop na die Indië 2022 WB-toernooi.

Dinsdag het Tiaan van der Merwe met 32 (74b), Faf du Plessis (uitgehardloop vir 31 van 76b) en Waldo Smith met 25 (43b) bygedra tot Namibië se lopiejaagtog, terwyl die Tanzanië-paaltjjies gedeel is tussen Faf du Plessis (3/41 in 10 bb), Max Heingo (3/32 in 9 bb), 10 boulbeurte), Dan Brassell (2/27 in 7) en Rowan van Vuuren (2/22 in 10).

Vir die Namibiërs sou gister se ontmoeting met Uganda ‘n moet-wen wees (uitslag teen druktyd nie bekend nie), met Kenia wat komende naweek ter afsluiting wag. Hulle vestig nou ook hul hoop dat Tanzanië teen óf Kenia óf Sierra Leone moet vasval om hul WB-kans lewendig te hou.