Steenkamp en Van den Bergh bly voor in die koor

Rolbal
Tielman Van Lill
  • 6 Months Ago 13 May 2024
Die eindstryde van die Namibië Rolbalvereniging (NBA) en hoofborg King Price se weeklange nasionale kampioenskap is Saterdag by die Eros-rolbalklub met titaniese mededinging beslis.

Marietjie van den Bergh het haar enkelspeltitel vir die derde jaar agtereenvolgens suksesvol verdedig toe sy Michelle Vermeulen met 20 skote teen tien uitoorlê het. Vermeulen was die verrassing van die kampioenskap wat deurgaans puik gespeel het.

Kat Steenkamp was die verdedigende enkelspelkampioen van 2023. Hy het opnuut sy slag teen die 60-jarige meester Julian Viljoen gewys toe hy goud met 21 skote teen elf opgeraap het. Viljoen het sestien jaar laas rolbal gespeel voor hy 18 maande gelede besluit het om weer sy toetrede tot die wonderlik toeganklike sport te maak.

‘n Beskeie Van den Bergh het aan Sport Wrap gesê: “Ek is bly om te sien daar is jonger spelers wat besig is om hul stempel af te druk. Hulle is nie net daar om deel te neem nie, maar is kompeterend. Ek moes in elke wedstryd veg om te wen en my titel te behou.

“In die enkelspelfinaal teen Michelle was dit beslis my jarelange ondervinding wat my beste bate was om opnuut die titel te wen.

“Ek wil graag King Price vir hul borgskap bedank. Ons het vir ‘n hele ruk nie ‘n borg gehad nie en waardeer dat King Price ons rolbal ondersteun.”

Die manswenner Steenkamp het gesê: “Die finaal was nie maklik nie. Julian is ‘n gesoute speler. Dit was ‘n goeie wedstryd en baie kompeterend. Ek is verlig dat ek weer die titel kon wen.”

Soos met ‘n krieketkolfblad het die grasoppervlak van elke rolbalbaan sy eie nukke en grille namate die dag vorder.

Steenkamp sê: “Die weer het die afgelope agt dae ‘n redelike invloed op ons spel gehad. In die oggende is die baan fermer en die balle rol vinniger en in die middag is die baan stadiger en laatnamiddag verander die temperatuur opnuut. So, jy moet baie oplettend wees en aanpas.

“Baie dankie aan die personeel wat die bane goed voorberei het. Ek moet my vrou en kinders en goeie vriend Axel (Krahenbuhl) en ander spelers vir hul ondersteuning gedurende die week bedank. Baie dankie aan King Price wat ons ondersteun en die kampioenskap moontlik gemaak het.

“Dis nie maklik om 'n week verlof van die werk te neem nie. Maar rolbal is vir almal. Rolbal diskrimineer nie teen ras, ouderdom en mense met liggaamlike gebreke nie. Almal is welkom by die wonderlike sport wat in goeie gees en sportmanskap gespeel word.”

Viljoen sê behalwe dat Steenkamp ‘n uitsonderlike speler is, het Steenkamp die baan beter gelees en vinniger by omstandighede aangepas.

“Kyk, Kat is goed, hy was my een voor met die lees van die baan en daar het hy my geklop. Ek het 16 jaar laas gespeel, maar ek het toe besluit om my terugkeer te maak. As ‘n man eers hier by die sestigs is, wil die lyf ná ‘n paar dae se spel nie meer so lekker saamwerk nie, maar ons ouer garde het die jeug gewys dis nie sommer net vir opdaag en kom vat nie.”

Uitslae van Saterdag se finale:

Enkelspel vroue: Goud Marietjie van den Bergh. Silwer Michelle Vermeulen.

Enkelspel mans: Goud Kat Steenkamp. Silwer Julian Viljoen.

Parespel vroue: Goud Marietjie van den Berg en Petro Breedt. Silwer Truda Meaden en Maureen Stadler.

Parespel mans: Goud Waylon Wentzel en Freddie Fouché. Silwer Schalk van Wyk en Claude Thornburn.

Gemengde dubbelspel: Kat Steenkamp en Anjuleen Viljoen. Silwer Waylon Wentzel en Marinda Bezuidenhout.

Driespel vroue: Goud Marietjie van den Bergh, Susan Venter en Petro Breedt. Silwer Anjuleen Viljoen, Michelle Vermeulen en Amanda Steenkamp.

Driespel mans: Goud Schalk van Wyk, Julian Viljoen en Gordon Damster. Silwer Colin Peake, Christo de Beer en Dirk Breedt.

Vierspel vroue: Goud Marietjie van den Bergh, Susan Venter, Petro Breedt en Peta-Anne Basford. Silwer Lesley Vermeulen, Annette Scholtz, Marinda Bezuidenhout en Valdi Wentzel.

Vierspel mans: Goud Schalk van Wyk, Julian Viljoen, Gordon Damster en Dave Gibbons. Silwer Johan Jacobs, Colin Peake, Piet du Plooy en Ewald Vermeulen.



Nuwe topbestuur

Die NBA het sy nuwe komitee vir die volgende termyn aangewys. Hulle is Anjuleen Viljoen (president), Diana Viljoen (visepresident), Lesley Vermeulen (spelersverteenwoordiger), Michelle Crawford (sekretaris en mediabeampte), Waylon Wentzel (tesourier) en Colin Peake (kompetisie-sekretaris).

– [email protected]